Jowhar, Gobolka Hirshabelle – Tallaabo muhiim ah oo loo qaaday dhinaca dimoqraadiyadda, wafdi heer sare ah oo ka socda Guddiga Madaxa-Bannaan ee Doorashooyinka Qaranka iyo Soohdimaha (GMDQS) ayaa kulan la yeeshay mas’uuliyiinta Dowlad Goboleedka Hirshabelle iyo kuwa maamulka Jowhar. Kulankan ayaa xoojinaya ballanqaad wadajir ah oo lagu doonayo in lagu hubiyo hanaanka diiwaangelinta codbixiyeyaasha oo hufan.

Wafdiga GMDQS, oo Jowhar ugu sugan howlo shaqo oo muhiim ah, waxay kulamo miro-dhal ah la yeesheen Mudane Cusmaan Maxamuud Mukhtaar (Baareey), oo ah Guddoomiyaha iyo Duqa Magaalada Jowhar, iyo Mudane Saciid Camalow, Wasiirka Wasaaradda Waxbarashada Hirshabelle. Waxaa sidoo kale kulanka goobjoog ka ahaa Agaasimaha Guud ee Wasaaradda Waxbarashada iyo Xoghayaha Dowladda Hoose ee Degmada Jowhar, taasoo muujinaysa sida ay u muhiim tahay iskaashiga dhammaan heerarka kala duwan.

Ajendaha ugu weyn ee kulanka ayaa ahaa dardargelinta iyo qorshaynta diiwaangelinta codbixiyeyaasha ee soo socota, taasoo la filayo inay dhowaan ka bilowdo Jowhar, caasimadda Hirshabelle. Labada dhinacba waxay hoosta ka xariiqeen muhiimadda ay leedahay in hawsha diiwaangelintu ay noqoto mid sahlan oo aan caqabad lahayn, si loo hubiyo in muwaadin kasta oo dagan Jowhar uu helo fursad uu isku diiwaangeliyo, uuna u guto xaqa asaasiga ah ee ah inuu codkiisa dhiibto doorashooyinka soo socda.

Iskaashigan ka dhexeeya GMDQS  iyo hoggaanka  Maamulka degmada Jowhar wuxuu tusinayaa shaqo wadareed adag oo lagu dhisayo aasaas daah-furan oo dimoqraadi ah. Wafdiga GMDQS ayaa  uga  mahadceliyay maamulka Jowhar soo dhaweyntooda diiran iyo sida firfircoon ee ay ula shaqeeyeen. Hadda waxaa si degdeg ah loo wadaa diyaargarowyadii lagu bilaabi lahaa hawsha diiwaangelinta codbixiyeyaasha, taasoo ah tallaabo muhiim ah oo kor loogu qaadayo ka-qaybgalka bulshada iyo xoojinta dowladnimada dimoqraadiga ah eeDowlad-Goboleedka Hirshabelle.